"139 رۆژنامەنوس دەستگیرکراون و 17 هەزار کەس بەنهێنی کوژراون" هاوسەرۆکی هەدەپە: لە ژێر زەمینەکانی جزیردا خەڵک بە زیندویی سوتێنران

خەندان
16-12-2019

 


خەندهاوسەرۆکی گشتی پارتی دیموکراتی گەلان (هەدەپە) رایگەیاند، لە ژێر زەمینەکانی جزیردا خەڵک بە زیندویی سوتێنران، وەک ئەوەی هیچ شتێک روی نەدابێت قسە دەکەن، دەشڵێت، "ئێمە هەمویان دەناسین، بۆیە پێیان دەڵێین هەموتان دادگایی دەکرێن".

لە جزیر و سلۆپی لە 14ی کانونی یەکەمی 2014وە هاتوچۆی شەقام لە خەڵک قەدەغە کراوە، وا چوار ساڵ بەسەر قەدەغەی هاتوچۆدا تێدەپەڕێت

 

سەزای تەمەللی، هاوسەرۆکی گشتی پارتی دیموکراتی گەلان (هەدەپە) لەمیانی وتارێکدا لە سێهەمین کۆنگرەی ئاسایی رێکخستنی هەدەپەی شاری ئەدەنە رایگەیاند، "دواڕۆژ و ئێستای دەسەڵات لەسەر ئینکار و لەناوبردنی گەلی کورد بونیاد نراوە، لە جزیر و سلۆپی لە 14ی کانونی یەکەمی 2014وە هاتوچۆی شەقام لە خەڵک قەدەغە کراوە، وا چوار ساڵ بەسەر قەدەغەی هاتوچۆدا تێدەپەڕێت، لە ئەنجامی گەمارۆی سەر 10 شار بە سەدان کەس کوژراون". 

دەسەڵاتی دژە دیموکراسییە، ئەم هێرشانە تا ئەمڕۆش بەردەوامن، لە ژێر زەمینەکانی جزیردا خەڵک بە زیندویی سوتێنران

 

ئاماژەی بەوەشکرد، "هۆکاری ئەمەش دەسەڵاتی دژە دیموکراسییە، ئەم هێرشانە تا ئەمڕۆش بەردەوامن، لە ژێر زەمینەکانی جزیردا خەڵک بە زیندویی سوتێنران، وەک ئەوەی هیچ شتێک روی نەدابێت قسە دەکەن، ئێمە هەمویان دەناسین، بۆیە پێیان دەڵێین هەموتان دادگایی دەکرێن".

دەسەڵاتی تورکیا 17 ساڵە دوژمنایەتی گەلی کورد دەکات

 

تەمەللی باسی لەوەشکرد، "دەسەڵاتی تورکیا 17 ساڵە دوژمنایەتی گەلی کورد دەکات، چوار ساڵ پێش ئێستاو لە رۆژێکی وەکو ئەمڕۆدا شارەکە ئابلوقە درا، لە 10 شاری گەمارۆدراو بە سەدان کەس کوژران، جزیرمان لەبیر نەکردوە، ئەو رۆژانەی ژن و منداڵ و کۆرپەی ئەم گەلە کوژران لە بیرمان نەکردون".

رونیشیکردەوە، "محەمەد تونچ و ئاسیە یوکسەل-مان لەبیر نەکردون، ناوچەی سوری ئامەدمان لە بیر نەکردوە، کاتێک سەیری چواردەورمان دەکەین، بکەرەکانی ئەو روداوانە، وەکو ئەوەی هیچ شتێک روی نەدابێت قسە دەکەن، هەروەها ئەوانەی لە دەسەڵات نەماون، وەکو ئەوەی هیچ پەیوەندییەکیان بەو روداوانەوە نەبوە، قسە دەکەن، ئێوە هەموتان بەیەکەوە دادگایی دەکرێن، چەندین ساڵە پلانی لەناوبردن بەردەوامە، قۆناغی چارەسەریی، بۆ ئاشتی تورکیا و رۆژهەڵاتی ناوەڕاست بو، ئیرادەو عەقلی چارەسەری هەبو، ئێمە لە دژی ئەو کەسانەین کە ئیرادەی چارەسەری لەناو دەبەن و بە هەمان بڕواوە خاوەنداریەتی لە ئاشتی و دیموکراسی دەکەین".

ئاکەپە بۆ ئەوەی لە دەسەڵاتدا بمێنێتەوە، بەردەوامە لەسەر سیاسەتە دوژمنکارییەکانی و بە ئارەزوی خۆی ئەندام و بەڕێوەبەرەکانمان دەستگیر دەکات

 

تەمەللی ئەوەشی خستەڕو، "ئاکەپە بۆ ئەوەی لە دەسەڵاتدا بمێنێتەوە، بەردەوامە لەسەر سیاسەتە دوژمنکارییەکانی و بە ئارەزوی خۆی ئەندام و بەڕێوەبەرەکانمان دەستگیر دەکات، نادادی و نایەکسانی لە هەمو شوێنێک بڵاوبوەتەوە، ئەم وڵاتە گەورەیە بوەتە گرتوخانەیەکی کراوە، گرتوخانەکان بۆ گیراوە سیاسییەکان بونەتە شوێنی ئەشکەنجەدان".

139 رۆژنامەنوس دەستگیرکراون، ئەم وڵاتە ئازادی رۆژنامەگەریی تێدا نییە، 17 هەزار کوژراوی بکەر نادییار هەن

 

لەبارەی دەستگیرکردنی رۆژنامەنوسان لە تورکیا تەمەللی رونیکردەوە، "بەپێی ئامارە فەرمییەکان، 139 رۆژنامەنوس دەستگیرکراون، ئەم وڵاتە ئازادی رۆژنامەگەریی تێدا نییە، 17 هەزار کوژراوی بکەر نادییار هەن، دایکانی شەممە هەمو هەفتەیەک دەنگیان بەرز دەکەنەوە، ئەم بێدادیی و نایەکسانییە جێگای قبوڵکردن نییە"

 

ناو
بۆچوون ...