سەبارەت بە بڕوانامەكەی ئەردۆگان، چالاكوانان داوادەكەن دادگای ئەوروپا بەدواداچون بكات

هەواڵ/ خەندان
22-12-2019

 

خەندان-

بە مەبەستی پێشكەشكردنی دواكارییەك سەبارەت بە لێكۆڵینەوە لە بروانامەی زانكۆی سەرۆك كۆماری توركیا، ژمارەیەك چالاكوان چونە دادگای مافەكانی مرۆڤ لە ئەوروپا.

ژمارەیەك چالاكوان ئەمڕۆ یەكشەممە چونە بەردەم دادگای مافەكانی مرۆڤ لە شاری ستراتسبرگ-فڕەنسا و بە مەبەستی لێكۆڵینەوە لە ساختە بون یاخود نەبونی بڕوانامەی بەكالۆریۆس-ی رەجەب تەییب ئەردۆگان، سەرۆك كۆماری توركیا داواكارییەكیان پێشكەشكرد.

ماوەیەكی زۆرە لە توركیا هەوڵدەدەن بیسەلمێنن كە بڕوانامەی زانكۆی ئەردۆگان ساختەیە


مێتین گیولێر، وتەبێژی ئەو گروپە چالاكوانە بە رۆژنامەنوسانی راگەیاند "ماوەیەكی زۆرە لە توركیا هەوڵدەدەن بیسەلمێنن كە بڕوانامەی زانكۆی ئەردۆگان ساختەیە، بەڵام لەگەڵ دادگای توركیادا نەیانتوانیوە بگەنە ئەنجام".

ئاماژەی بەوەشكرد "ئێمە دڵنیاین لە ساختەبونی بڕوانامەی زانكۆیی ئەردۆگان، نەمانتوانی سەبارەت بەو بابەتە بێدەنگ بمێنینەوە و هەوڵی پێویستماندا، هەر لەو چوارچێوەیەدا ئەو پرسەمان گەیاندوەتە دادگای مافی مرۆڤی ئەوروپا".

ئەو چالاكوانە لەمیانی وتەكانیدا راشیگەیاند "بەهۆی گەیاندنی ئەم پرسە بە دادگای ئەوروپا گیانی خۆمان خستوەتە مەترسیەوە، بەڵام توانیومانە پرسی ساختەبونی بڕوانامەی زانكۆیی ئەردۆگان بخەینە بەردەم كۆمەڵگەی نێودەوڵەتی".

دادگای مافی مرۆڤی ئەوروپا بڕیاریداوە بە لێكۆڵینەوە لە بڕوانامەكەی سەرۆك كۆماری توركیا


بەگوێرەی رۆژنامەی زەمان-ی توركی، یاسایی و مافپەروەرانی دادگای مافی مرۆڤی ئەوروپا بڕیاریداوە بە لێكۆڵینەوە لە بڕوانامەكەی سەرۆك كۆماری توركیا و داوایان لەو گروپە چالاكوانە كردوە تەواوی بەڵگەنامە پێویستەكان پێشكەشبكەن.

لەماوەی چەند ساڵی رابردودا، بروانامەی زانكۆ-ی سەرۆك كۆماری توركیا لە وڵاتەكەدا بوە جێی مشتومڕێكی زۆر، لەكاتێكدا دەنگۆی ئەوە بڵاوبوەوە بڕوانامەكە ساختەیە و لەڕاستیدا ئەردۆگان خاوەنی بڕوانامەی زانكۆ نیە.

ناو
بۆچوون ...