گەنجێكی برادۆستی ماوەی نزیكەی پێنج مانگە لەلایەن پارتیەوە دەستگیر كراوە

هەواڵ / لڤین
28-12-2019

 

گەنجێكی برادۆستی كە دوكاندارە ماوەی نزیكەی پێنج مانگە لەلایەن ئاسایشی پارتیەوە دەستگیر كراوە و تۆمەتەكەشی ئەوەیە كاڵای بە گەریلاكانی پەكەكە فرۆشتووە و كەسوكاری گەنجەكەش رەتیدەكەنەوە كوڕەكەیان پەیوەندی بە هیچ حزبێكەوە هەبێت.  

ئیلاد یاسین برادۆستی، دوكاندارە و دانیشتووی گوندێكی كێلە شینە لە دەڤەری برادۆست، دوای ئەوەی ژمارەیەك خەڵك كاڵا دەبەنە ناوچەكە بەناوی دوكانەكەی ئەو دەیبەن بەو هۆیەوە لەلایەن ئاسایشی پارتیەوە لە ناوەڕاستی مانگی ئابەوە دەستگیر دەكرێت و تا ئێٍستا ئازاد نەكراوە. 

بەوتەی سیداد یاسین، برای ئەو گەنجە بە (لڤین پرێس)ی راگەیاند: ئاسایش براكەمی بانگ كرد بۆ قسەكردن لەسەر ئەو بابەتەی گوایە بازرگانی خۆراكی لەگەڵ پەكەكە كردووە، چونكە لەكێلەشین لەژێر هەژموونی پەكەكەدایە لەوێ دوكانی هەبوو خەڵكێك كاڵایان بردووە و وتویانە بۆ دوكانەكەی ئەوبرایەمی دەبەن بۆیە بانگی ئاسایشیان كرد. 

ئەو رونیشی كردەوە براكەی هیچ كاڵایەكی نەداوەتە گەریلاكانی پەكەكە كردنەوەی دوكانەكەشی بە رەزامەندی ئاسایشی ناوچەكە بووە، بەڵام دواتر كە براكەم لەگەڵ باوكم سەردانی ئاسایش دەكات دەستگیری دەكەن. 

سیداد باسی ئەوەشی كرد كە دوای دەستگیركردنی براكەی چەندن جار هەوڵیانداوە براكەی ئازاد بكەن، بەڵام ئاسایش دەستی دەستی پێكردوون و تا ئێٍستاش ئازادیان نەكردووە. 

برای ئەو دەستگیر كراوە ئەوەشی راگەیاند براكەی هیچ پەیوەندی بە سیاسیەتەوە نیە هەرگیز پەیوەندی لەگەڵ هیچ حزبێك نەبوە، ئەو هیواشی خواست كە ئاسایش براكەی ئازاد بكەن. 

پارتی لەداوی رووداوی هێرشكردنە سەر بەرپرسێكی توركیا لە رێستۆرانتی هۆقەباز لە شاری هەولێر چەندین كەسی لە عەشیرەتی برادۆستیەكان دەستگیر كردووە و هەریەكەشیان بە تۆمەتی جیاواز دەستگیر كراون. 
 

 

ناو
بۆچوون ...