زانیاریه‌ك له‌قه‌ندیله‌وه‌..."هێزه‌كانى پارتى ده‌یانه‌وێت سه‌نگه‌ره‌كانى گه‌ریلا داگیربكه‌ن"

هەواڵ
25-04-2022

 

شارپرێس

هێزه‌كانى پاراستنى گه‌ل (هه‌په‌گه‌) ئاشكرایكرد، له‌ماوه‌ى هه‌فته‌یه‌كى ئۆپه‌راسیۆنه‌كه‌ى توركیادا لە(زاپ، ئاڤاشین‌و مەتینا) گه‌ریلا 152 چالاكیان دژى سه‌ربازانى توركیا ئه‌نجامداوه‌و به‌و هۆیه‌شه‌وه‌ 218 سەرباز کوژراون، ده‌شڵێت:"پارتى ڕێگه‌ى به‌سوپاى توركیادا لاى ئه‌وانه‌وه‌ هێرش بكرێته‌سه‌ر ئێمه‌و به‌وه‌ش خه‌نجه‌ریان له‌گه‌ریلا دا".


ناوەندی ڕاگەیاندن‌و چاپەمەنیی هەپەگە له‌ئامارێكدا چالاكیه‌كانى گه‌ریلاى له‌ماوه‌ى هه‌فته‌یه‌كى به‌رده‌وامیی شه‌ڕدا بڵاوكردۆته‌وه‌ لەناوچەکانی زاپ‌و ئاڤاشین، ئاماژه‌ به‌وه‌شكراوه‌، "تورکیا هەموو ڕۆژێک بەفڕۆکەی جەنگیی‌و پێشکەوتووترین تەکنەلۆژیا جوگرافیای کوردستان بۆردوماندەکات، بەڵام ناتوانێت ئامانجەکانی بەدەستبهێنێت".

شەوی17ی ئەم مانگە، سوپای توركیا هێرشی زەمینی، بۆسەر چیای كوڕەژارۆ، زاپ، مەتیناو ئاڤاشین لەئامێدیی دەستپێكرد، ئەوەش لەكاتێكدابوو لە15ى ئه‌م مانگەوه‌ هێرشی ئاسمانیی بۆسه‌ر ئەو ناوچەیە دەستپێكردبوو.

له‌و ڕوه‌شه‌وه‌ هه‌په‌گه‌ جه‌ختده‌كاته‌وه‌، "هێرشه‌كه‌ى 17ى ئه‌م مانگه‌ هێرشێکی بەفراوانی داگیرکاریی بوو كه‌ لە(زاپ‌و ئاڤاشین)ه‌وه‌ دەستى پێکردو هێرشێکی ئاساییش نییە، بەڵکو شەڕێکی گەورەیە لەئاستی شەڕی نێوان دوو دەوڵەتدا".

له‌و ئاماره‌دا هه‌په‌گه‌ ئاشكرایكردووه‌، "لە17 تا 24ى ئه‌م مانگه‌، گەریلا 152 چالاکیی جیاجیای دژی سوپای تورک ئەنجامداوە کە 58 چالاکییان شەڕو گورزلێدان‌و 29 چالاکیی بەچەکی قورس‌و 29 چالاکیش تەقاندنەوەو 23 چالاکیش قەناسبەدەسته‌كامان ئه‌نجامیانداوه‌، هه‌روه‌ها سێ چالاکییش هەڵکوتانەسەر بووه‌و، حەوت چالاکیی ڕێکخراوو سێ چالاکیی کە بەنهێنیی چوونەتە ناو داگیرکەران‌و گورزیان لێداون".

هەپەگە ئه‌وه‌شى باسكردووه‌، "ئەوەندەی هێزەکانمان پشتڕاستیانکردووەتەوە، 387جار هەرێمەکانی پاراستنی مەدیا بۆردومانکراون، كه‌ 243جاریان بەکۆپتەری جەنگیی‌و هاوەن تۆپباران‌و بۆردوومان ئەنجامدراوەو حەوتجاریش سەنگەرەکانمان بەچەکی کیمیایی بۆردومانکراوە".

ته‌ئكیدیكردۆته‌وه‌، هه‌ر لەماوەی هەفتەی ڕابردوودا بەگوێرەی ئامارەکە، 218 داگیرکەر سزادراون‌و 48 داگیرکەریش برینداربوون، هاوکات چوار درۆن خراوەتە خوارەوەو گورز لە11 کۆپتەرو درۆنێکیش دراوە، سەنگەرێک خاپوورکراوەو سیستمێکی کامێرای حەراریی تێکشکێندراوە".

له‌باره‌ى شه‌وى یه‌كه‌مى ئۆپه‌راسیۆنه‌كه‌ش هه‌په‌گه‌ بڵاویكردۆته‌وه‌، "هێرشە داگیرکارییەکان سەرەتا لە14ى نیسانەوە بەبۆردوومانی چڕ دەستیپێکرد، شەوی 17ی نیسان سەرباری بۆردوومانی فڕۆکەی جەنگیی، هەوڵیدا بەکۆپتەر هێز لەناوچەکانی گەریلا دابنێت، هێزەکانمان لەهەموو شوێنەکان بەبێ سانسۆر وەڵامی پێویستیان دانەوە، ڕێگەیان نەدا داگیرکەران داببەزن، شەویش بەهەمانشێوە هەوڵیاندا دابەزن، هێزەکانمان بەردەوامبوون لەبەرپەرچدانەوەیان‌و گورزیان لە11 کۆپتەر وه‌شاندووه‌".

له‌باره‌ى داگیركردنى چه‌ند خاڵێكى هه‌ستیاریش هه‌په‌گه‌ ڕه‌تیكردۆته‌وه‌و دەڵێت:"سوپای تورکی داگیرکەر کە نەیتوانی سەربازەکانی لەئاسمانەوە داببەزێنیت، ئەمجارە هەوڵدەدات لەزەمینەوە بێت، بەڵام گەریلاکان بەبەرپەرچدانەوەیان ڕێگەیان نەداوه‌ تائێستا سوپای تورک بەئامانجەکانی بگات".

سه‌باره‌ت به‌بەکارهێنانی گازی کیمیاییش لەلایەن سوپای تورکیاوه‌، هەپەگە وتویه‌تى:"سوپای تورکی داگیرکەر لەچوارەم ڕۆژی هێرشەکانییەوە چەکی کیمایی بەکاردەهێنێت لەناوچەکانی (کوڕەژارۆ، وەرخەلێ، شەهید شاهین، کونیشکاو گردی ناوەڕاست".

باسى هاوكاریی‌و هه‌ماهه‌نگى نێوان پارتى‌و توركیا كراوه‌ له‌و سنورانه‌و هه‌په‌گه‌ ڕایده‌گه‌یه‌نێت، "تورکیا لەباشووری کوردستانەوەو لەهێڵی بامەڕنێ، ئامێدی‌و دێرەلوکەوە هێرشیکردەسەر زاپ، پارتیش بەئاشکرا ڕێگەیدا لەپشتەوە خەنجەر لەسەنگەرەکانی گەریلا بدرێت، هێزەکانی پارتى لەپشتی کوڕەژارۆ جێگیربوون‌و هەوڵیاندا ناوچەکانی گەریلا داگیربکەن، ماوەی هەفتەیەکە هێزەکانی پارتى تائێستاش دەستیان لەو هەڵوێستە هەڵنەگرتووە.

ش.هـ

ناو
بۆچوون ...