به‌وێنه‌..تورکیا دایکێک‌و 4 منداڵى به‌سه‌ختى برینداركرد

هەواڵ
18-05-2022

 

شارپرێس ـ كه‌نداڵ جودى ـ عین عیسا

لەئەنجامی بۆردومانی سوپاى تورکیا لەگوندی قرتەکی باشووری شارۆچکەی عەین عیسا له‌ڕۆژئاواى كوردستان دایکێک‌و چوار منداڵى برینداركرد.


به‌گوێره‌ى ڕاپۆرتێک کە ناوەندی ڕاگەیاندن‌و پەیوەندییەکانی هەسەدە بڵاویكردۆته‌وه‌و وێنه‌یه‌كى ده‌ست شارپرێس كه‌وتووه‌، شەوی ڕابردوو توركیا بۆردومانى ئه‌و گونده‌ى كردووه‌و بریندارەکانیش گەیەندراونه‌ته‌ نه‌خۆشخانه‌ى شارى ڕەققە.

له‌ڕاپۆرته‌كه‌دا ناوی بریندارەکان ئاشكراكراوه‌ كه‌ به‌مشێوه‌یه‌یه‌:"دایکه‌كه‌ ناوى (مه‌دهى)یه‌و منداڵەکانیش ناویان عەلی حەمود (9 ساڵان)، عەزرا عەلی حه‌مود (تەمەن 10 ساڵ)، کوتلە عەلی حه‌مود (تەمەن 6 ساڵ)، حەییل عەلی حەمود (تەمەن 12 ساڵ)".

بەپێی ڕاپۆرتەکه‌، دۆخی بەشێک لەبریندارەکان مەترسیدارەو مەترسی گیانله‌ده‌ستدانیان هه‌یه‌.

گوندی قرتەکە دەکەوێتە باشوری شارۆچکەی عەین عیسا لەهەرێمی کۆبانێ، لەگوندەکەدا دەیان هاوڵاتی‌و خانەوادەی کۆچبەرانی گرێ سپی دەژین.

بەگوێرەی ناوەندی ڕاگەیاندنی هەسەدە، تورکیا بەئەنقەست ماڵی هاوڵاتیانی لەگوندی قرتكه‌ تۆپباران کردووە.

تورکیا ساڵانێکە ناوچەکانی خۆبەڕێوەبەریی کوردو پێکهاتەکانی دیکە تۆپباران دەکات، بۆ ئەوەی خەڵک کۆچبکەن‌و ناوچه‌كانیان به‌جێبهێڵن، وه‌كو هه‌سه‌ده‌ش جه‌ختی له‌سه‌ركردۆته‌وه‌، ئامانجى توركیا له‌وكاره‌، گۆڕینى دیمۆگرافیای ڕۆژئاواى كوردستانه‌.

ش.هـ

 

ناو
بۆچوون ...