سوید .. پانیڵێکی تایبەت بە پرسی کورد بەڕێوەچوو

هەواڵ
22-08-2022

 

رێگای کوردستان

ڕۆژی یەکشەممە ٢١-٨-٢٠٢٢ رێکخراوی کلتوری مێزوپۆتامیا لە شاری یەڤلێ له سوید پانیڵێکی تایبەت بە پرسی کوردی بۆ نوێنەرانی شەش پارتی سوید ڕێکخست.

هەروەها بەشێک لە چالاکوانانی سیاسی کوردستانی و لە میانەیان هاوڕێ نەرمین نەجمەدین مامۆ ئەندامی کۆمیتەی ناوەندی حزبی شیوعی کوردستان بانگێشتکرابوون بۆ گفتوگۆکردن لە سەر پرسی کورد و ئەو گۆرانکاریانەی لە سیاسەتی سوید ڕوویانداوە بەتایبەتی ملکەچ بوونی دەسەڵاتە سۆشیال دیموکراتەکەی سوید بۆ داواکارییەکانی رەجەب تەیب ئەردۆغان بۆ بە ئەندام بوونی سوید لە هاوپەیمانی ناتۆ و ڕادەستکردنەوەی چالاکوانانی سیاسی کوردو ئۆپۆزسیۆنی تورکیا بە ئەنقەرە.

هاوڕێ نەرمین نەجمەدین مامۆ، لە پانیڵەکەدا ناڕەزایی تووندی لە دژی سیاسەتی سازشکارانەی حکومەتی سوید دەربڕی و ڕایگەیاند: ملکەچکردنی سوید بۆ مەرجەکانی دەوڵەتێکی نا دیموکراتی وەکوو تورکیا، مایەی ناڕەزاییەو شەرمەزارییەکی گەورەیە بۆ سەر یاساو ڕێساو بانگەشەکانی ئەم وڵاتە لەبارەی پاراستنی مافی مرۆڤ و یاسا نێودەوڵەتیەکانی تایبەت بە پاراستن و داڵدەدانی پەنابەرانی سیاسی.

پاشان باسی لە تاوانەکانی دەوڵەتی تورکیا دەرهەق بە کوردو ئۆپۆزسیۆن کردو ڕایگەیاند: دەوڵەتی تورکیا تاوانەکانی دژ بە مافی مرۆڤ تەنها لەناو سنووری خۆیدا ئەنجامنادات بەڵکوو ڕۆژانە لە ڕێگای هێرشی زەمینی و ئاسمانی پەلاماری خەڵکی سیڤیلی هەرێمی کوردستان و ڕۆژئاوای کوردستان دەدات و کۆمەڵکوژی دەکات، تەنانەت تاوانەکانی هێندە قێزەونە تا ئێستا بەدەیان جار کەمپی کوردانی پەنابەری باکووری کوردستانی لە مەخمور بۆردومانکردووە کە ئەو کەمپە لەژێر سەرپەرشتی UN دایە، حزبی شیوعی کوردستان بە بەیاننامەو گوتاری سیاسی و خۆپێشاندان بەردەوام ئیدانەی تاوانەکانی دەوڵەتی تورکیا دەکات.

ئیتر شەرمەزاری گەورەی حکومەتی سوید لێرەدایە سازش بۆ ئەم جۆرە دەوڵەتە دەکات کە باسم کردو دەبێتە نەنگیەکی گەورە بۆ مێژووی سۆشیال دیموکراتەکان و وڵاتی سوید بەگشتی، بۆیە داوادەکەم ڕای گشتی سوید ڕۆڵی خۆیان ببینن لە دژی ئەو ڕێککەوتنە پڕ شەرمەزاریەی لە نێوان سۆشیال دیموکراتەکان و حکومەتی ئاکەپەی ئیسلامیی تورکیا کراوە.

ناو
بۆچوون ...