ئەو کۆڵانە

تەرزە جاف
02-09-2022

ئەو كۆڵانە چەند جوانە
كە چیتر من هیچ ماڵێكم نییە لەوێ.
ئەو دایكە چەند فریشتە
چەند شۆخ و باڵا چنار
ئەو خەونانەش چەنێك ئەفیوونی و درۆزن
كاتێك بە نەشئەی پێكەنینێكەوە لە خەو بە ئاگام دێنن
گوڵی باخچەی ئەو ماڵەم نیشان دەدەن
كە چیتر من جێگەم تێیدا نابێتەوە.
دێنەوە بیرم :
تەلیسمی هاتنەوەی میهرەبانی دایكم لە قوتابخانە
كە ئاوەدانی و بۆنی چێشتلێنانی دەهێناوە ماڵ
وێنەی ئەو گوڵە باخە مۆرەی لە سووچێكی باخچە گەورەكەمانەوە
عەیار و جوان بۆنی بە هەموو باخچەكەدا بڵاو دەكردەوە
رەنگی ئەو سووراوانەی كە چاوەڕێم دەكرد بەتاڵ بن تا
ماڵە باجێنە بە قاوغەكانی بكەم
بۆنی ئەو كتێب و دەفتەرە نوێیانەی
كە دایكم و باوكم پێكەوە بۆیان لە بەرگ دەگرتم
یەكەمین پێڵاوی بن بەرز كە شەو تابەیانی لای خۆمەوە نواندمن
زەنگی جەژنانە و
ئەو شیلكانەی بە دزی دایكمەوە سەریان لە ژێر گەڵاكانیانەوە دەردەهێنا و
لیكیان دەڕژاندە دەمم
كاتی نان خواردن و ریزكردنی حەوت قاپ و حەوت كەوچك و حەوت پەرداخ..
ئەو ماڵە چەند جوان
كە من چیتر خاوەنی باڵكۆنەو گوڵەمێخەكەكانی نیم
تاسەی ئەو كاتانەی لە گەڵ خوشكەكەم تازە فێری قاپ شتن دەبووین
جارجار لە سەربانەكەی تەنیشتمانەوە
دەنگی پیاوێك بە گاڵتەجاڕییەوە ڕای دەچڵەكانین:(( كچێ ئەوە هێشتا تەواو نەبوون؟))
ئێمەش بە حیتە حیت و شەرمەوە كۆشی خۆمان دادەپۆشی و خۆمان گورج دەكردەوە.
هەمیشە دڵم بە پێكەنین و قسە و تەنانەت قاتە سپیەكانی كاك زاهیری دراوسێمان خۆش.
ئەو حەوشەیە چەند جوان
كە من منداڵ قاپم تێیدا دەشت لەوێ
[(هەموو بەیانیەكی عازەبیم لە حەوشەكەدا كاتێك دەستم دەكرد بە خوێندن, قەفەسی كەوەكانم بە داری گێلاسەكەوە هەڵدەواسی. ئەگەر بیرم بچوایە حاجی ئەحمەدی دراوسێمان لە من پەرۆشتر لە سەر دیوارەكەوە دەیگوت: ((باوكەكەم ئەو كەوانە بهێنە دڵم بە خوێندنیان دەكرێتەوە))].
ئەمشەو
بیری جارجار دەركەوتنی كاك زاهیر و
دەنگی میهرەبانی حاجی ئەحمەد و
پێكەنینە فریشتەییەكانی دایكم دەكەم
من سەفەرێك بە سەردان چوومەوە لای دایكم
پەڕۆیەكی ڕەش بە دیوارە سوورەكەی ماڵمانەوە هەڵواسراو
لە سەرقەبرانیش, حاجی ئەحمەد
قورئانی لە سەر قەبری دایكم دەخوێند
بازرگانێكیش , دەیانگوت “لە ناوەندی بازاردا فیشەكێكی بە كاك زاهیرەوە نابوو”
هەرزوو حاجی ئەحمەدیش سەری نایەوە.
لە گەڵ هەموو ئەمانەشدا ,كەچی
ئەو كۆڵانە هێشتا
چەند جوانە كە من هیچ ماڵێكم چیتر نیە لەوێ.

ته‌رزه جاف

ناو
بۆچوون ...