مەیخانەکەی ئۆرتینە ... و .. لە خەیاڵ جوانتر

سلام سعید
16-10-2022

 

خەمی هەمو دنیام بەرێ و لەبەردەم تاسەی

هاتنتا ..

سوکە بەڵێنێکم بەرێ

من بۆ دیداری سروشتی هاتنت

سەد خەرمانی ئارامم مەڵۆ کردوە

لە بەدەم سەرنج و نیگاتا

چی فرمێسکم هەڵ ڕشتوە

دەستی لەرزۆکی بێ ئارامیم

مەدە دەم گڕی نەهاتنت

حەزی سۆزم بۆ باوەشی ژوانێکت

سەد چەپک خۆزگەی گرتوە

تۆ ئارام بەو هێمن لەچاوما پشو بە

من سەبری ئەیوبم هەیە

ساڵ و تەمەن لەبەر نیگام خۆی ناگرێ

تۆ بەڵێنێ بەمن بدە ، وەک شێخی پیر

لەبەردەم مەیخانەکەی ئۆرتینەدا

دواین پشوم و نیگایەک

پێش مردنم بەتۆ ئەدەم

لەخەیاڵ جوانتر .... ساباتی سەری سپیم

خەمی هەزار دەنکە یادی

لەلای تۆ جێ هێشتوە

من کە شەیداو سەرمەستی معشوقێکم

چیم بەسەر وەرزی گریانە

کەگریان خۆی ئەچێتەوە

سەر ڕەچەڵەکی ئێوارە خەمبارەکانی من

تەنیایم هاوڕێیەکی هەمیشەیی

بێدەنگی ئێوارەکانی ڕوحمە

کەناوێرم سێبەری دارکاژەکە جێ بهێڵم

ئەڵێم نەبا گوڵە گریاوەکان لەکەناری ئارامدا

پەلی ئازارێکی تر ڕا بکێشن

ئەتوانی لە پاڵمدا دەستی تەنایم بگری

ئەوسا ئەزانی بێزاریم چۆن

ماڵی بێهودەیم ئاگر ئەدا

من ئێواران تاڵە تاڵەکانی هەناسەو

جار جار مشتێ فرمێسکو

دەلۆیەکی پڕ ناڕەحەتیم

لەبەردەم چاوەڕوانی هاتنتا دائەنێم

ئەڵێم نەوەک سەردانێکت شتێک

لەخەمەکانم لا جێ بهێڵێ

سەرێ لە کۆڵانی منداڵیت نادەی

لە سوچێکی دەرگای بیرە وەریەوە

مناڵیت ناخوێنیتەوە

من ئێستاش بەکراسێکی شینەوە

بەدیت ئەکەم

قژ بژ چۆن غرورت بەدەم ڕێوە ئەو کۆڵانەی

پڕ ئەکرد

ئێستاش پیریم لەدەفتەری هەرزەی تۆدا

لاپەڕەکانی تەمەن ئەگەڕێ

گەرچی ژیان باڵی حەزتی

چەند جار کردی

بەڵام نەی توانی جوانیت لێ سەنێ

تۆش لە خەیاڵی من زەوت کا

لە ڕوح جوانتر دەنکە مرواری تەمەنم

ئەو ڕۆژانە لەبیر ناکەم .

کە هەوری پڕ بارانی خەیاڵ

بۆ هاتنت هەزار ڕستەی پێ ئەنوسیم

،،،،،،،،،،،. ،،،،،،،،،،،،،،.

سلێمانی

١٦/١٠/٢٠٢٢

 

ناو
بۆچوون ...