مەزڵوم کۆبانێ بۆ یه‌كه‌مینجار زانیاری نه‌بیستراو له‌باره‌ی چه‌ند پرسێك ئاشكرا ده‌كات

دیدار
23-11-2022

 

خه‌ندان

مەزڵوم کۆبانێ، فەرماندەی گشتی هێزەکانی سوریای دیموکرات (هه‌سه‌ده‌) رایگه‌یاند، ئەو ژنە (ئه‌حلام مه‌نسور) كه‌ لەسەر ته‌قینه‌وه‌كه‌ی ئیستانبوڵ ده‌ستگیركراوه‌، لە خێزانێکەوە هاتوە کە پەیوەندییان بە داعشه‌وه‌ هه‌یه‌ و سێ برای له‌ ریزه‌كانی ئه‌و رێكخراوه‌دا كوژراون، برایەکی دیکەشی فەرماندەی ئۆپۆزسیۆنی سوریایە، کە تورکیا لە عەفرین پشتیوانی دەکات، ده‌شڵێت، "توركیا ده‌یه‌وێت هێرشی زه‌مینی بكاته‌ سه‌ر كۆبانێ".

کۆبانێ بۆ کورد زۆر ڕەمزە، لەوێدا خەباتی نەتەوەییمان دەستیپێکرد

مەزڵوم کۆبانێ له‌ چاوپێكه‌وتنێكدا له‌گه‌ڵ ماڵپه‌ڕی ئەلمۆنیتۆر، له‌باره‌ی هێرشه‌كانی توركیا كه‌ ماوه‌ی چه‌ند رۆژێكه‌ بۆ سه‌ر رۆژئاڤای كوردستان ده‌ستیپێكردوه‌، رایگه‌یاند، "ئەگەری زۆرە ئامانجی هێرشێکی زەمینی تورکیا بۆ سەر ناوچەکانی رۆئاڤا، کۆبانێ دەبێت، کۆبانێ بۆ کورد زۆر ڕەمزە، لەوێدا خەباتی نەتەوەییمان دەستیپێکرد و هەروەها شەڕی دژی دەوڵەتی ئیسلامیش لەوێ دەستیپێکرد، گرنگییەکی ستراتیژی هەیە، چونکە ڕێگە بە تورکیا دەدات بچێتە پاڵ عەزاز (ڕۆژئاوای ڕوباری فورات) بۆ ئەو ناوچانەی کە تورکیا لە ئۆکتۆبەری 2019 دەستی بەسەردا گرتبو".

کۆبانێ شارێكی دێرینی كورده‌ ئەو شوێنەیە کە هاوپەیمانی دژی داعش تیایدا راگەیەندرا

كانتۆنی کۆبانێ شارێكی دێرینی كورده‌، ئەو شوێنەیە کە هاوپەیمانی دژی داعش لە نێوان هاوپەیمانی نێوده‌وڵه‌تی بە سەرۆکایەتی ئەمریکا و کوردەکانی سوریا پێکهات، به‌وهۆیه‌وه‌ توانرا كۆتایی به‌ خه‌لافه‌تی رێكخراوه‌كه‌ له‌ سوریا بهێنرێت.

مەزڵوم کۆبانێ له‌ چاوپێكه‌وتنه‌كه‌دا نیگه‌رانی خۆی له‌ لاوازی وه‌ڵامی ئه‌مریكا و روسیا بۆ هێرشه‌كانی ئه‌م دواییه‌ی توركیا ده‌رده‌بڕێت، كه‌ به‌هۆیه‌وه‌ 11 هاوڵاتی مه‌ده‌نی لە ناوچەی ژێر دەسەڵاتی کورد گیانیان لە دەستدا و وتی، "ئه‌گه‌ر واشنتن و مۆسكۆ بێده‌نگ بن، پێده‌چێت توركیا هێرشه‌كانی بۆ سه‌ر رۆژئاڤا هاوشێوه‌ی ساڵانی 2018 و 2019 ده‌ستپێبكاته‌وه‌".

ئەردۆگان کار بۆ وروژاندنی هەستی ناسیۆنالیستی له‌ وڵاته‌كه‌یدا دەکات

جه‌نه‌ڕاڵ مه‌زڵوم دوایین هێرشەکانی تورکیای گەڕاندەوە بۆ هەوڵەکانی رەجەب تەیب ئەردۆگان، سەرۆک کۆماری تورکیا بۆ وروژاندنی هەستی ناسیۆنالیستی له‌ وڵاته‌كه‌یدا بەر لە هەڵبژاردنەکانی ساڵی داهاتو، به‌تایبه‌ت كه‌ توركیا روبه‌ڕوی قه‌یرانی ئابوری و هه‌ڵئاوسان و زیادبونی رێژه‌ی بێكاری بوه‌ته‌وه‌.

ئەو دامەزراوەی کرایە ئامانج لەگەڵ ئەمریکییەکان مەشقی هاوبەشی هێزەکانمان ئەنجام دەدەین

له‌باره‌ی كردنه‌ ئامانجی بنكه‌یه‌كی سه‌ربازی هاوبه‌شی هێزه‌كانی دژه‌ تیرۆر و ئه‌مریكا له‌ حه‌سه‌كه‌، مه‌زڵوم كۆبانێ وتی، "فڕۆکەی بێفڕۆکەوان ناوچەیەکی كردوه‌ته‌ ئامانج، کە نزیکەی 500 مەتر لەو بینایەوە دورە، تورکەکان دەزانن کە ئەمریکییەکان لەوێ ئامادەن، دامەزراوەیەکی هاوبەشە، ئێمە لەوێ مەشقی هاوبەشی هێزەکانمان ئەنجام دەدەین، ده‌بێت لە خودی ئەمریکییەکان بپرسرێت کە ئایا پێشوەختە ئاگادارکراونەتەوە یان نا".

بەبێ گڵۆپی سەوز لەلایەن واشنتن یان مۆسکۆوە، تورکیا ناتوانێت هێرش بکات

ئاماژه‌ی به‌وه‌شكردوه‌، هه‌ڕه‌شه‌كانی توركیا به‌ جددی وەردەگرن، تا هەوڵێکی جددی نەدرێت بۆ ڕاگرتنی تورکیا، بە تایبەت لە لایەن ئەمریکا و ڕوسیا، بەڵام "ئەوەش دەزانین کە بەبێ گڵۆپی سەوز لەلایەن واشنتن یان مۆسکۆوە، تورکیا ناتوانێت هێرشی زەمینی بۆ سەر هێزە کوردییەکان ئەنجامبدات، کە دەکەوێتە ناوچەی نفوزی خۆیانەوە، هەر ئۆپەراسیۆنێکی زەمینی سەرکەوتو پێویستی بە پشتیوانی ئاسمانی دەبێت، وەک لە لەشکرکێشییەکانی پێشوی تورکیادا بینیمان، تا ڕوسیا و ئەمریکا ڕێگە بە فڕۆکەکانی تورکیا نەدەن کە ئاسمانی ژێر دەسەڵاتی خۆیان بەکاربهێنن، تورکیا ناتوانێت بجوڵێت".

تا مۆڵەت وه‌رنه‌گرن تورکەکان هێرشی زەمینی ئەنجام نادەن

ئه‌وه‌شی خسته‌ڕو، "تا مۆڵەت وه‌رنه‌گرن تورکەکان هێرشی زەمینی ئەنجام نادەن، ئەوە ئەوەیە کە من باوەڕم پێیەتی و گەلەکەمان باوەڕیان پێیەتی، ئەگەر لەشکرکێشییەکی زەمینی هەبێت ئەوە لەبەر ئەوەیە کە ئەو جۆرە مۆڵەتە دراوە یان لەبەر ئەوەی ڕوسیا و ئەمریکا بێدەنگیان هەڵبژاردوە".

ئەمریکییەکان دەڵێن هیچ کارێکی لەو جۆرە لەلایەن تورکیاوە پەسەند ناکەن

له‌وه‌ڵامی ئه‌و پرسیاره‌ی ئایا له‌باره‌ی هێرشی توركیا له‌گه‌ڵ ئه‌مركییكان قسه‌ی كردوه‌، مه‌زڵوم كۆبانێ وتی، "تا ئێستا هەڵوێستیان ئەوە بوە كه‌ پێمان دەڵێن هیچ کارێکی لەو جۆرە لەلایەن تورکیاوە پەسەند ناکەن و دژایەتیان دەکرد، دوای هێرشەکەی دوێنێ قسەمان لەگەڵ وتوێژکارە ئەمریکییەکانمان کرد، بەڵام ئەمە دۆخێکی تازەیه‌ بۆیە ئێمە بە هاوبەشی هەڵسەنگاندنی بۆ دەکەین".

ڕوسیا دژی هێرشی وشکانی تورکیایە

په‌یوه‌ست به‌ وه‌ڵامی روسیا، مه‌زڵوم كۆبانێ وتی، "ئەوان کەم تا زۆر ئەوە دەڵێن کە ئەمریکییەکان دەیڵێن، بەڵام ئەوان تەنانەت کەمتر كۆكن لەگەڵ تورکیا، ڕوسیا دژی هێرشی وشکانی تورکیایە، بەڵام دژایه‌تی تەنها بەس نییە، کۆبانێ و منبج، هەمو ئەو ناوچانەی تورکیا دەکرێنە ئامانج لەژێر کۆنتڕۆڵی ڕوسیادان".

له‌وه‌ڵامی ئه‌و پرسیاره‌ی ئایا بەربەستی بەردەم ڕێککەوتن لەگەڵ دیمەشق چییە؟، مه‌زڵوم كۆبانێ وتی، "ئەوان ئامادە نین، ڕوسیاش فشاری پێویست لەسەریان ناکات، بێگومان کێشەیەكی دیكه‌ ئەوەیە کە حکومەت لە دیمەشق خۆی به‌بێ بەدیل دەبینێت و ئەم بیرکردنەوەش وایان لێدەکات کە چارەسەرنەکراوتر و وەڵامنەدەرەوە بۆ داواکارییەکانمان".

تورکیا دژی دەستکەوتی هه‌مو کوردێکە، جا لە سوریا بێت، عێراق بێت، ئێران بێت یان لە ناوخۆی تورکیا

له‌باره‌ی ئه‌وه‌ی بۆچی توركیا ئه‌م كاته‌ی هه‌ڵبژاردوه‌ بۆ هێرشكردن، مه‌زڵوم كۆبانێ ده‌ڵێت، "تورکیا دژی دەستکەوتی هه‌مو کوردێکە، جا لە سوریا بێت، عێراق بێت، ئێران بێت یان لە ناوخۆی تورکیا خۆیدا، تورکیا دەیەوێت ئیدارەی خۆسەری ئێمە لەناوببات، ئەوە ئامانجی سەرەکییەتی، ئێستا توركیا به‌ره‌و هه‌ڵبژاردن ده‌ڕوات و ئه‌ردۆگان ده‌یه‌وێت سۆزی ناسیۆنالیسته‌كانی وڵاته‌كه‌ی بۆ لای خۆی رابكێشێت".

له‌ پێش هه‌ڵبژاردندا دو ڕێگا له‌به‌رده‌م ئەردۆگاندایە، یان له‌گه‌ڵ كورد رێكبكه‌وێت یان شەڕێک هەڵبگیرسێنێت

ئه‌وه‌شی خسته‌ڕو، "له‌ پێش هه‌ڵبژاردندا دو ڕێگا له‌به‌رده‌م ئەردۆگاندایە، یان له‌گه‌ڵ كورد رێكبكه‌وێت یان شەڕێک هەڵبگیرسێنێت، ئەوان شەڕیان هەڵبژاردوە، ئەردۆگان شەڕی هەڵبژاردوە".

بۆ یەکەمجار ئەم زانیاریانە بۆ میدیاکان ئاشکرا دەکەم، کە ئەو ژنە  لە خێزانێکەوە هاتوە کە پەیوەندییان بە داعشەوە هەیە

له‌باره‌ی ئه‌وه‌ی كێ به‌رپرسیاره‌ له‌ هێرشه‌كه‌ی ئیستانبوڵ؟ كه‌ توركیا هێزه‌كانی یه‌په‌گه‌ تۆمه‌تبار ده‌كات، فه‌رمانده‌ی گشتی هه‌سه‌ده‌ وتی، "پێموایە ئەوە کردەوەیەکی ئیستفزازی بو کە لەلایەن حکومەتی تورکیاوە بیری لێکرایەوە بۆ ئەوەی زەمینەسازی بۆ شەڕی دژی ئێمە بکات، ئێمە لێکۆڵینەوەیەکی زۆرمان کردوە و گەیشتوینەتە ئەو ئەنجامەی کە هێرشەکە لەلایەن گروپە ئۆپۆزسیۆنەکانی سوریاوە ئەنجامدراوە، کە لە ژێر کۆنتڕۆڵی تورکیادا کاردەکەن، بۆ یەکەمجار ئەم زانیاریانە بۆ میدیاکان ئاشکرا دەکەم، کە ئەو ژنەی (ئه‌حلام مه‌نسور) لەسەر روداوه‌كه‌ بۆمبەکە دەستگیرکراوە، لە خێزانێکەوە هاتوە کە پەیوەندییان بە دەوڵەتی ئیسلامییەوە هەیە".

سێ برای ئه‌حلام مه‌نسور لە ریزه‌كانی داعشدا كوژراون

مه‌زڵوم كۆبانێ وتیشی، "سێ برای ئه‌حلام مه‌نسور لە ریزه‌كانی داعشدا كوژراون، یەکێکیان لە ڕەقە گیانی لەدەستداوە، یەکێکی دیکە لە منبج و سێیەمیش لە عێراق گیانی لەدەستداوە، برایەکی دیکە فەرماندەی ئۆپۆزسیۆنی سوریایە، کە تورکیا لە عەفرین پشتیوانی دەکات، هاوسەرگیری لەگەڵ سێ چەکداری جیاوازی دەوڵەتی ئیسلامی کردوە و خێزانەکەی خەڵکی شاری حەلەبه‌، ئێمە بە هیچ شێوەیەک پەیوەندیمان بە بۆردومانەکەوە نەبوه‌ و هیچ سیاسەتێکی لەو جۆرەمان نییە".

ناو
بۆچوون ...