2 لەقەسیدەی جوانترین ئافرەتی قیامەت ........................................ڕووزار

ڕۆژار ئەحمەد
02-12-2022

بەشی782 لەقەسیدەی جوانترین ئافرەتی قیامەت
........................................ڕووزار

پێش چەند هەنگاوێ
بیرێک لەخۆشەویستی قووڵتر هەیە
ژیان ملبادانی بادەیەکی تاڵە
بەدڵێکی شرین
ئەگەرنا لەوەتی ساقی مەی دەگێڕێ
دڵێکی وێرانەی نەدۆزیوەتەوە
بۆ نیشتنەوەی پاسارییەک تێدا بەئارامی،
لەناو مەلهاکاندا بۆ ڕاستی بگەڕێ
بزانە چەند ژنی ڕۆبۆتکراو
بەکۆنتڕۆڵی ڕۆژگار دەسوڕێ!
لەکۆتایی جەنگەکان سەردانی
ماڵی ژنێک بکە 
کوڕە تاقانەکەی ونکردبێ
بزانە چۆن پێناسەی نیشتمان دەکا!
بەهەشت تەسبیحاتی دەستبەتاڵی گەمژەکانە
بەفیکرێکی ناو قوماتی تەوقیتکراو،
تۆ هەرچی بڕوێنی هەردەبی بەقوربانی
 لێرە تۆوەکان بۆخۆشەویستی لەبارنین
بڕوانە لەگەڵا 
ئەوە چۆن دڵێکە دار هەیەتی
چ وانەیەکی سەختە پاییز
قەت بۆلەبەرکردن ناشێ،
کێمان وەڵامی پاییز دەداتەوە
تابەهارو گوڵ لەدەرگای بێ؟
گوڵبەهار هاوڕێی دایکم بوو
چەندجار گوێم لێبوو
دەیوت (قەدەرێ یار .......
لەکۆترەوە بۆ کتێب
کۆترەکانی من بیانکوژیت 
تاقەتی فڕینیان نی یە
زوو تاک دەبنەوەو
ئەوانەی هاوڕێ ی گیانی بوون
زوو لەیەک جوداو
زۆرجار بینومە ساغترینیان
مەرگی مجافاتی کردووە،
کتێبەکانیشم هەروا
ئەوانەی زەمەنی خۆشەویستی و
سەردەمی ست فاتیمەو
نەسرین دەمێکە داخت لەدڵمەو
یاران وەستێم و
تاوەکو تەعاروفم لەگەڵ
 (ئارثر شوبنهاور) نەکرد
مانای ژیانم نەزانی
بەداخەوە باوکانی ئێمە زۆرجار
لەناوەکانمانەوە تەبخ و فەوتمان دەکەن!
ئەوا بیرو فیکرمان دەستی لێ بشۆ
ئەوەی بۆمانی دەدورن
کراسێکە بەسوژن دوراوە!
کەی خۆزگەت بۆمناڵی بردەوە
ئەوا یەکەمین نیشانەی پووچی ژیانەو
تۆ تێدا مەحکومبووی بەبەتاڵی
هەندێکمان قورسین بۆ تێگەیشتن و
کەچی لەسەر ئەو کارتۆنانە دادەنیشین
واپڕن شوشەوات!
ناسکی و تێگەیشتن
 لەدڵ و فەرهەنگی ئێمەدا سەقەتە!
بۆنموونە من چاوم لەجیرانەکەمە
لەسەیارەی هاوڕێکانم
نابینم چۆن ئەسڵی خۆم دەفرۆشم
بۆساختەیی کەسێکی تر!
هەریەکەو بەکەیل و تەرازوی خۆمان
بەهار لەگەڵ پاییز دەکەینە مامەڵەوە
لەپەپوولەوە بیگرە تاوەکو هەنگ
زمستانێک کامە گوڵ هات و
تاوستانێک کامە باران
ڕووی کردە گەرمیانی وشک و
وتی دەمت بێنە هانێ ماچ!
گۆشەی خۆشەویستی من هەر خەیاڵە
بڕۆ سەرێ لە ئاوایی دڵم بدە
بزانە تەنیایی چۆن گرم و گۆزم پێ دەکا٫
مرۆڤ چەند خۆشە
دووربێ لەگڕو تینی فێرەزانین!
وەفایی شاکارێکی بۆجێهێشتین
خۆزگە شیرینی هەموومان تەشی دەڕێسا!
هیچ نەبوایە بەئینتیزار دەماینەوە
من چیبکەم لەوژنەی 
بەفێرەزانینەوە ماڵی دڵ ناناسێ!؟
ونبووین لەنێوان سیندان و
چەکوشی شارا 
دوو دڵ خۆیان بەبەیاری بۆیەک نەفڕن
بەئاوی باران گوڵی لێ ناڕوێ،
ئەم خەمخانیە بڕازێنە
دایکم شەو نیە بەسواری بوراق نەگەڕێتەوەو
ناو کانتۆرەکەی نە پشکنێ!؟
ئاخر بێخەم ڕەوێنی و
سپڵەیی ئازیزان وات لێدەکا
پشیلەیەکت خۆشبوێ!
دوودڵم لەڕەنگی ڕەشی قەل و
 سپی نەورەسەکان!
ئێستاش فۆتە ڕەشەکەی دایکم
بۆنی ئاشتی و
تارای سپی چیاکان شەڕ!
دیکتاتۆرەکان زۆریان خۆشەویستبوون!
نیشتمان لایان گاڵتەو
سنور سینی و فڕکە فڕکی مشکان نەبوو!
تۆ کاتێ عەردەکەت دەکێڵی
دەبێ سایلۆکان بۆ خۆشەویستیبن
نەک ئاڵ و وێری بازرگانەکان،
مەرج نیە هەردووکمان پێکەوە بفڕین
نیشتنەوەی من فرسەتێکە
بۆگەیشنی تۆ بەهێلانە!
گەرماو سەرما
بە بەرگ و ڕەنگ نیە
بەڵکو ئەو مشتە نەفسەیە
کاتێ بەرەڵای دەشتی دڵی تۆبوو
زانیم دەدابەستەکردن لەناو
بەیارێکی تەنگ و تاردا
وەکو خوێندنەوەی مەلێک وایە
 لەدەرەوەی پۆلەکان!
ئەوانەی لەجەنگەکاندا دەپێکرێن
ئەوانەن دوژمن دەسخەڕۆ دەکەن
کەچی لێدوان لەوانە وەردەگرن
واقاچیان تەڕنەبووە،
مەدالیا بەسنگی ئەوانەوە هەڵدەواسن
قاتەکانی بەریان
دەرچووی موناسەباتەکانە!
سەیرە !
(ئەدی داز )مارکەیەکی گران بەهابوو
کەچی دوو لاوی گەرمیان
بەجووتێ تەقلیدی شڕەوە
لەکوێستان شەهیدکران!
بەداخەوە نەما (خانی)
ئەم خانووە قوڕانەی گەرمیان
 بکا بەهەزاویەک شەوەو
چیرۆکی (قابیل)ەکانمان 
بۆ بگێڕێتەوە،
من کردومە بەعادەت
کاتێ تۆ دەفڕی من دەنیشمەوە...(ڕووزار)
ماوییەتی

ناو
بۆچوون ...