لۆفیگارۆ: خۆپیشاندانەکانی هەرێم قەبارەی ئەو گەندەڵییە دەردەخات کە لەسەرتاسەری عێراقدا هەیە

هەواڵ
15-12-2020

 

شارپرێس:

ڕۆژنامه‌یه‌كى فه‌ره‌نسى له‌سه‌ر خۆپیشاندان‌و هه‌ڵمه‌تى ڕه‌شبگیریی چالاكانى خۆپیشانده‌ران له‌لایه‌ن هێزه‌ ئه‌منیه‌كانه‌ ڕاپۆرتێكى بڵاوكردۆته‌وه‌و باسى له‌وه‌كردوه‌، خۆپیشاندان‌و ناڕەزایەتییەکانی هەرێمی کوردستان قەبارەی ئەو گەندەڵی‌و کەموکوڕیە سیاسیی‌و ئابوریەی دەرخست کە لەژیانی عێراقییەکاندا هه‌یەو دەستیکردوە بەگواستنەوە بۆ ئەو ناوچانەی کە پێشتر تاڕادەیەک ئارام بون‌و لەژێر کۆنترۆڵی کوردەکاندایە.

ڕۆژنامەی "لۆفیگارۆ"ی فەرەنسی لەڕاپۆرتێکدا باسی لەوەکردوە، خۆپیشاندان‌و ناڕەزایەتییەکانی هەرێمی کوردستان قەبارەی ئەو گەندەڵی‌و کەموکوڕیە سیاسیی‌و ئابوریەی دەرخست کە لەژیانی عێراقییەکاندایەو دەستیکردوە بەگواستنەوە بۆ ئەو ناوچانەی کە پێشتر تاڕادەیەک ئارام بون‌و لەژێر کۆنترۆڵی کوردەکاندایە.

ڕۆژنامە فەڕەنسییەکە باسی لەوەکردوە، دەسەڵاتدارانی هەرێم هەوڵی سەرکوتکردنی ئەو ناڕەزایەتیانە دەدەن کە بەهۆی گەورەبونی نائومێدییەکانیان‌و دواکەوتنی موچەی فەرمانبەران‌و خراپ ئیدارەدانی وڵاتەوە سەریانهەڵداوەو دواتر لەسەر شەقامەکان توندوتیژی لێکەوتۆتەوە.

لەبەشێکی تری ڕاپۆرتەکەی لۆفیگارۆدا هاتوە ((خۆپیشاندەرانی هەرێمی کوردستان لەبەهەدەردانی سەروه‌ت‌و سامانی وڵاتەکەیان‌و ئەو گەندەڵییە بێزارن کە جیاوازیی‌و درزێکی گەورەی خسۆتە ناو سامانی هاوڵاتیانی ئاسایی‌و سیاسییەکانی هەردوو پارتی دەسەڵاتداری هەرێم کە دەسەڵاتی ڕەهایان هەیە)).

ئه‌وه‌شى نوسیوه‌:"سەرکردە کوردەکان، خۆپیشاندانەکانیان بەپیلانگێڕیی‌و بونی دەستی دەرەکی تۆمەتبارکردوە، بۆئەوەش دەستیانکردوە بەبڕینی هێڵەکانی ئینتەرنێت‌و کۆتوبەندکردنی ئازادییە گشتییەکان‌و دەستگیرکردنی ئەو ڕۆژنامەنوسانەی ڕوداوەکان ڕوماڵ دەکەن".

لۆفیگارۆ ئاماژەی بەوەشکردوە، ئاستی هەژاری لەهەرێمی کوردستان زۆر زیادیکردوەو بڵاوبونەوەی پەتای کۆڕۆناش قەیرانەکەی قوڵترکردۆتەوەو تێکڕای بێکاری بەرزکردۆتەوە.

ئامادەکردن: ئاکۆ ئاڵی

ناو
بۆچوون ...